Рөстәм Шәрипов Заһир Исмәғилов исемендәге Өфө дәүләт сәнғәт академияһында ҡурайсы һөнәрен үҙләштерә. Ижад юлын студент сағында уҡ Башҡорт дәүләт филармонияһында башлай һәм һуңғы һулышына тиклем унда эшләй. Йәш булыуына ҡарамаҫтан тамашасы һөйөүен бик тиҙ яулап өлгөрә ул.
Ҡурайсының репертуары бай йөкәмәткеле һәм күп яҡлы. Рөстәм Шәриповтың ҡурайынан урғылған башҡорт халыҡ һәм башҡа бихисап халыҡтар көйө, эстрада, классик көйҙәре - барыһыла илаһи моң булып мәңгелеккә тамашасы күңелендә урын алды. Рөстәм Шәриповты ижадташ дуҫтары һәм тамашасылар һәр ваҡытта камиллыҡҡа ынтылған, яҡты күңелле, ихлас кеше тип иҫкә ала. Уның юғары башҡарыу оҫталығы, милли сәнғәтте пропагандалауға һалған көсө баһалап бөткөһөҙ. Ул сәнғәт оҫталары менән бер рәттән Төркиәлә уҙған Башҡортостан көндәрендә, Кубала, Эстонияла, Ҡаҙағстанда, Мәскәүҙә, Санкт-Петербургта, Ырымбурҙа һәм башҡа ҡалалар һәм илдәрҙә тамашасыларҙы башҡорт моңона сорнаны. Шулай уҡ йәш ҡурайсы Республика конкурстары лауреаты исеменә лә күп тапҡыр лайыҡ була. Рөстәм Шәрипов мәңгелеккә арабыҙҙан китһәлә уның ҡурай моңо, халҡы өсөн янып йәшәгән йөрәгенең йылыһы күңелдәрҙә һаҡланыр.
Билдәле ҡурайсы, моң әһеле Рөстәм Шәриповтың яҡты иҫтәлегенә арналған тамашаға рәхим итегеҙ!
